Sprovat e zemrës

Youtube/Tezkije

Sprovat e zemrës

Nasir el Umer

01.10.2013

Rastet ku zemra mund të sprovohet janë të shumta, ne do të përmendim kalimthi vetëm disa prej tyre. Do të trajtojmë disa raste duke hedhur poshtë kështu pretendimin e disa njerëzve të cilët mendojnë se zemrat sprovohen vetëm nga pasionet dhe mëkatet, ndërkohë që e vërteta është krejtësisht ndryshe. Allahu i Madhëruar thotë në Kuran: “Ne ju vëmë në provë me të keqe dhe me të mirë dhe te Ne do të ktheheni.”[1]

Ja disa nga këto raste:[2]

1. Adhurimi

Shembuj adhurimesh: namazi, lëmosha, agjërimi, haxhi etj, konsiderohen sprova për zemrën, pasiqë këtu vërtetohet sinqeriteti për Allahun, pa i kushtuar rëndësi prezencës së njerëzve. Allahu i Madhëruar thotë në Kuran: “Dhe Ne do t’u qasemi veprave që kanë bërë ata dhe do t’i shndërrojmë në pluhur e hi.”[3]

Ndërsa në një hadith përmendet: “Ruhuni nga shirku i fshehtë! Thanë: “O i dërguar i Allahut çfarë është shirku i fshehtë? Tha: “Një person përgatitet të falet në prezencë të njerëzve, pasi vëren se ata janë duke i kushtuar vëmendje, ky konsiderohet shirk i fshehtë”.[4]

Gjatë adhurimeve zemra sprovohet, pasur parasysh nivelin e përsosjes së veprave si dhe realizimin e tyre sipas këshillave të dërguarit të Allahut, si dhe shkallën e devocionit që arrihet përmes tyre. Allahu i Madhëruar thotë në Kuran: “por arrin përkushtimi juaj.”[5]

Mund të themi gjithashtu se kjo konsiderohet pjesa më e lehtë e sprovës lidhur me trajtesën e mëparshme.

2. Dituria

Dituria konsiderohet nga hapësirat ku më së shumti sprovohet zemra. Sa njerëz kanë dështuar në këtë provim?! Shumë prej tyre ishin të sinqertë në fillimet e studimit, por pastaj qëllimi i tyre i sinqertë u shndërrua në një pasion të fshehur; etje për pozitë, famë, lidership, ndjenjë superioriteti, hipokrizi, polemikë, shpifje ndaj kundërshtarit etj.

Në një hadith qëndron: “Kush e mëson diturinë me të cilën shpresohet kënaqësia e Allahut, me arsyen që të përfitojë diçka nga të mirat e kësaj Bote, nuk do ta ndjejë aromën e Xhenetit Ditën e Gjykimit".[6]

3. Propaganda

Propaganda konsiderohet një fushë akoma më e gjërë se dituria dhe rastet e sprovave konsiderohen të panumërta. Njerëzit e angazhuar me propagandë fetare hasin më shumë vështirësi dhe konsiderohen më të sprovuarit në këtë aspekt. Pasioni për orientimin e masave, fama, mbivlerësimi i vetes etj, konsiderohen sprova të rrezikshme që propagandën mund ta shndërrojnë në sprovë (Allahu na ruajt) dhe tërheqje prej saj, ndërsa zhvillimi i saj larg fokusit dhe synimit të kënaqësisë së Allahut do të konsiderohej më pas një sëmundje e pashërueshme.

4. Mospajtimet dhe polemikat

Këto konsiderohen vatrat e shejtanit dhe livadhet e tij, për këtë arsye Allahu na ka paralajmëruar në Kuran duke sjellur shembuj për metodën e dialogut. Allahu i Madhëruar ka thënë në Kuran: “Thirr në rrugën e Zotit tënd me mençuri dhe këshillë të bukur dhe diskuto me ata në mënyrën më të mirë!”[7]

Diskutimi fillimisht mund të jetë i motivuar nga qëllime të sinqerta, si: triumfimi i të vërtetës, por përgjatë tij qëllimi mund të devijojë në synime personale, këtu fshihet dhe sëmundja. Allahu i Madhëruar thotë në Kuran: “Diskutoni me ithtarët e Librit vetëm me mënyrën më të mirë.”[8]

Të vërtetën ka thënë Ibn Mes’udi -Allahu qoftë i kënaqur me të-: "Polemika është e dëmshme."

5. Pasionet

Jo pa qëllim e rendita këtu, pasi shumica e njerëzve bien shpesh pre e pasioneve të tyre si: pasuria, automjetet, femrat, fëmijët etj, të cilat padyshim renditen mes sprovave:

“Pasuria dhe fëmijët tuaj janë vetëm sprovë për ju.”[9]

Gjithashtu i Dërguari i Allahut -Paqja dhe Mëshira e Allahut qoftë për të- ka thënë: “Dynjaja është e bukur, e gjelbër dhe Allahu do t’ju vendosë mëkëmbës në të që të vështrojë si do të silleni, prandaj kini kujdes në këtë Botë dhe ruhuni prej femrave, sepse sprova e parë e Beni Israilëve ishin femrat.”[10] Sprova e lartpërmendur konsiderohet sëmundja më e rëndë dhe gëzon ndikimin më negativ të zemrës.

6. Dyshimet dhe sprovat

Këto konsiderohen dy nga hapësirat më të mëdha të cilat shkaktojnë sëmundjet e zemrës siç do t’i sqarojmë në vazhdim.

7. Dëshira për pozitë

Sa njerëz kanë ndryshuar e sa zemra i ka kapluar urrejtja pikërisht për shkak të dashurisë së postit prej të cilës vetëm pak njerëz shpëtojnë. Xhelozia, urrejtja, mendimi i keq për tjerët, të gjitha këto sëmundje në shumicën e rasteve lindin si pasojë e dëshirës për pozitë.

8. Krenaria me prejardhje dhe fama

Kjo është fusha ku çelin shumica e sëmundjeve dhe ligësive të zemrës. Epërsia, krenaria, mendjemadhësia etj, shfaqen në këtë fushë, aty mbillen dhe po aty japin frutat.

Tani është e nevojshme të sqarojmë disa sëmundje dhe ligësi me të cilat sprovohet zemra, por fillimisht do të japim disa udhëzime.

[1] Surja Enbija, ajeti 35

[2] Rastet nuk konsiderohen shkaqe, ato janë më të përgjithshme, sepse dituria konsiderohet rast jo shkak, ndërsa pasioni konsiderohet rast dhe shkak.

[3] Surja Furkan, ajeti 23

[4] E bëri sahih Ibn Huzejme

[5] Surja Haxh, ajeti 37

[6] Ebu Davudi (15/349), Ibën Maxhe (1/93) dhe Tirmidhiu kanë thënë hadithi është hasen

[7] Surja Nahl, ajeti 125

[8] Surja Ankebut, ajeti 46

[9] Surja Tegabun, ajeti 15

[10] Muslimi nga Ebu Said el-Hudrij (2098/4)

...vazhdon (Përktheu dhe përshtati, Blerim Rexha)